Na Rivarivabi Levu

Sa tekivu na cakacaka vakamataisau ni veibuli. Vakanananutaki na veika vakamatalalai me vakayacori. Droinitaki beka na kena veilaini eso. Io, e dua na rivarivabi e tiko na vakanananu ni Kalou. Baleta ni na soli na galala ni digidigi vei ira eso na nonai bulibuli, e tiko na ririko ni so era na vakatanitaka ka vakavuleqa vei ira tale eso.

Ea vakasama sara vakatitobu na matavuvale vakalomalagi ka mani caka e dua na plan. Kevaka e mani talaidredre ka i valavala ca na veika buli, eratou sa tu vakarau na vuvale oqo me ratou na cola na kenai vua. Na bucibucini oqo e vakayacori tu ena nodratou yalololoma kei na lomasoli.

Na nona volavola na apositolo enai 1 Pita 1:18-20, eda raica ni se bera mada ga ni buli na vuravura, sa davo oti nai nakinaki me soli na bula ni Lami, na Luve ni Kalou, me i soro ni talaidredre ki na nona lewa na Kalou.

Sa dua na Kalou vinaka eda qarava, ena nona qarauna tu na veisaqata kece ni veika e bulia. E kila ko koya ni na yaco na leqa ka sa vakavakarau me walia. 

Na kena vulici ka vakanananutaki na veika ka a vakayacora na Kalou ena vukuda ena veisautaka vakadua na noda rai me baleta e levu na ka. 

Ena sauma e levu na lomatarotaro me vaka qo, "Kevaka e lomani keda na Kalou, na cava na vuna eda tiko leqaleqa tiko kina o keda na kai vuravura. Na cava na vuna e yaco tiko kina na mate, na tagi, na rarawa, na veivakacalaka eso, na veivakararawataki, kei na vuqa tale na vei leqa eso?"

Baleta ni raiyawa na Kalou, e bulia vakamatau o koya e dua nai tuvatuva balavu me walia kina na leqa ni valavala ca. Na rivarivabi levu ni lomana e toka ena kilaka ni na yaco me mate kina na luvena ka rawa ni vakayali koya vakadua kevaka a sega ni qaqa o Jisu ena vuravura qo. Io e dodonu me muri na lawa ka kaya ni i sau ni valavala ca na mate. Na mate oya a eya taura ena vukuda na nodai Vakabula ka rawa me nomu nai solisoli ni bula tawamudu kevaka ko vakabauti Koya.

Sa dua na veisorovaki levu a vakayacora ena vukuda na matavuvale vakalomalagi. Eda sa bau lomani ka talei dina sara ga ena matadratou. Ni rawa vei ratou me ratou vakayalia na ka kece ena vukuda... O... Sa usivi dina ga na noda Kalou.